كيف تؤمن الدور بخمس خطوات عبقريه

عودة الدوري وتأمينه سؤال حير العالم عامة والاعلام الرياضي خاصة لدرجة ان الواحد بدأ يفكر ازاي يجاريهم ويعلا كمان عليهم عشان أحيانا لازم تدوش الدنيا عشان ما تحسش بدوشتها، يعني مثلا الإعلامي أيمن يونس بيشتكي من ان الفيفا اجبرتنا على جعل أسوار الملاعب قصيرة وكانت النتيجة مذبحة بورسعيد طبعا هو فاته ان الهدف من الأسوار القصيرة ان لو حصلت مصيبة زي مذبحة بورسعيد الجماهير تقدر تهرب بدل ما يتحبسوا داخل الأسوار العاليا، ومن هنا كان السؤال ... احنا ليه أصلا محتاجين أسوار أو حتى مدرجات؟!

ليه ما نعملش بدل المدرجات تبقى أرض عالية نجيلة حوالين الملعب والملعب يبقى كأنه في منحدر جواها حاجة كدة زي مدرجات سباقات "الفورميلا وان" و"الموتو جي بي" أو زي ملاعب الجولف، وميزة الموضوع ده ان الجماهير تشجع وهي مستريحة عل النجيلة كأنهم في رحلة وشايفين الملعب كويس والأهم من ده كله ان الأرض العالية مش ها تنهار زي ما ممكن يحصل للمدرجات وتبقى كارثة، كمان لو حصل مذبحة زي مذبحة بورسعيد بدل ما حد يزقك وتقع من فوق المدرج كل اللي ها يحصلك انك ها تدرحج على النجيلة وديه تعتبر طريقة هروب سريعة كمان ولو حابب تجري على الشارع برة ما فيش حاجة ها توقفك لإن مش ها يبقى فيه سور حوالين الأرض أصلا.

طبعا حد ها يسألني طب وها تنظم ازاي الدخول والخروج ومافيش اسوار ولا بوابات ها ارد عليه همال يعني ازاي بينظموا سباقات الفورميولا يا راجل كبر مخك، وبعدين أكيد في طريقة، ان شاء الله حتى تأجر عمال قبل المباراة يمدوا شريط مكتوب عليه منطقة عمل نأسف للازعاج ويمثلوا انهم بيحفروا ويسيبوا كام مدخل من غير حفر للناس وأول ما المبارة تبدأ يشلوا كل حاجة ويمشوا.

ده بالنسبة للمدرجات انما بالنسبة لظاهرة اقتحام الملعب فديه لا محتاجة أسوار قصيرة زي ما الفيفا عايزة ولا أسوار طويلة زي رأي يونس كل الحكاية مين أصلا اللي قال ان تراك الجري يبقى حوالين ملعب الكورة ، ناس قلودين قوي، فيها إيه لما نبدل تراك الجري بحمام سباحة أوليمبي ونخلي تراك الجري مكان حمامات السباحة في النادي، كل المطلوب ان اللعيبة يدخلوا الملعب من فوق حمام السباحة بسقالات وتتشال أول ما المباراة تبدأ وريني بقى مين ساعتها ها يحاول يقتحم الملعب، ده المشجع من دول ها يحتاج يدحرج على النجيلة الأول وبعيدن يعوم بهدومة في حمام السباحة وطبعا موبايله ها يبوظ ولو معاه بطاقة قديمة ها تبوش ولو بيقطع من المترو رايح جاي التذكرة اللي ها يرجع بيها ها تروح عليه غير ان بعد ما هدومه تتبل ها يبقى تقيل ومش ها يعرف يطلع من حمام السباحة من غير ما حد يشده وحتى لو عرف يطلع لوحدة ها يبقى ظهرة مبلول واي ضربة عليه ها تقدر تلسوعة لو نجح في كل الاختبارت ديه اصلا ها يبقى سهل تقبض عليه عشان ها يبقى المشجع الوحيد اللي مستني لوحدة بعد المباراة ومش عارف يروح قبل ما ينشف الأول.

فيها إيه لما نبدل تراك الجري حوالين ملعب الكرة بحمام سباحة أوليمبي ونخلي تراك الجري مكان حمامات السباحة في النادي

كمان حمام السباحة ليه فوائد أخرى خاصة في احتفال اللعيبة بالإهداف ويرشوا مية على الجماهير ويشاركوهم الفرحة باختصار ها يزود الأجواء الاحتفالي، وأي محلل أو مدرب أو صحفي بسهولة يقدر يوصل لإحصاءات المباراة ومعرفة عدد التسديد على المرمى والركنيات بمجرد عد عدد الكرات العايمة على وش المية ورا شباك كل فريق، كمان لو الجماهير فكرت تحدف طوب حكم الراية بسهولة يقدر يعرف ان فعلا الجماهير حدفت طوب من الطرطشة اللي ها تعمله وصوتها ويلغي المباراة.

نيجي بقى لارتياب مجدي عبد الغني من الثراء الظاهر على مشجعي الكرة وشكه في مصادر تمويلهم نظرا لارتداء بعضهم كوفيات ثمن الواحدة يجي بـ 30 جنيه، الحقيقة ديه ميزة مش عيب، كدة نقدر نعمل زي المساجد الكبيرة نخلي فيه أمانات تجبر المشجع على ترك كوفيته الغالية ومايستلمهاش الا بعد انتهاء المباراة، طبعا كدة انت ماسك المشجع من كوفيته اللي بتوجعه، وها تلاقيه قاعد بيتفرج زي الألف، قمة في الانضباط مش بعيد يتخانقوا على الجلوس في الصفوف الأمامية عشان يثبتوا لمراقب المباراة انهم ما بيعملوش شقاوة، وهايشجعوا من غير صوت عشان لو فيه بيت عنده ثانوية عامة ومش بعيد كمان يزعقوا للعيبة عشان بيلعبوا بصوت عالي ويقطعوا لهم الكورة لو جات عندهم بالمقص.

أما بخصوص تفتيش المشجعين عشان الأسلحة البيضاء وتصوير بطاقاتهم فده فكر أمني عقيم أكل عليه الدهر وشرب كمان، مهما ان عملت مستحيل تطلع الأسلحة اللي معاهم زيها زي الشماريخ اللي بتدخل كل مباراة بالرغم من صرامة التفتيش، كمان التفتيش بيولد احتكاك وحساسية بين الجماهير والداخلية احنا غير مستعدين لها خاصة بعد الثورة عشان كدة الحل الأمثل بدل ما تبذل مجهود في تفتيش اللي معاهم أسلحة وتفشل في العثور عليه، سلم كل مشجع بريء مطواة قرن غزال يتخصم ثمنها من ثمن التذكرة وبكدة تبقى أمنت المشجع البريءغير المسلح بانه يبقى مسلح ويقدر يدافع عن نفسه، الفكرة معتمدة على توازن القوى اللي بيحكم نواميس الكون، حاجة كدة زي ما باكستان عندها نووي والهند عندها نووي فكدة مستحيل يحاربوا بعض، زي المعونة الأمريكية لمصر عشان تفضل بنفس مستوى وقدرات تسليح اسرائيل، بزمتك عمرك شوفت أسد عايز ياكل نمر، عمرك شوفت واحد صعيدي أو بدوي بيشتكي من انه اتعذب في قسم شرطة، توازن القوى الناتج عن تسليح طرفين متصارعين بينتج عنه تناغم جديد نابع من الرهبة واحترام الخصم والخوف من عاقبة المواجهة.

أما الاقتراح الأخير فيفضل عدم استخدامه إلا في حالة فشل كل المحاولات السابق ذكرها وهو مستوحى من منظومة الدسكوتيك وإرهاصات أمم أفريقيا 2006 ألا وهو عدم السماح بدخول المباريات إلا للكابلز فقط، عندها سيختفى العنف من ملاعبنا بلا رجعة ونستبدل التشجيع والضجيج والشتائم والسباب بالهمس والتسبيل وعبارات الاستحسان.